Монгол Улсын Ерөнхий сайд У.Хүрэлсүх тэргүүтэй Уул уурхайн сайд Г.Ёндон, Төрийн эмчийн бодлого зохицуулалтын газрын дарга Б.ЦэнгэлУИХ гишүүн Ч.Ундрам, Д.Өнөрболор нарын холбогдох албаныхан 9 сарын 17-ны өдөр Хөтөлийн “Цемент Шохой” ХК-аар зочилж, үйлдвэрлэлийн үйл ажиллагаатай танилцлаа.

Уулзалтын үеэр Үйлдвэрлэл хариуцсан захирал А.Дэмчигжав үйлдвэрийн өнөөгийн байдал, цаашдын тулгамдаж буй асуудлуудыг танилцуулсан бөгөөд Ерөнхий сайд хэлэхдээ “Цемент Шохой” ХК нь Эрдэнэт Үйлдвэр ТӨҮГ-т 37 жилийн турш технологийн шохойг тасралтгүй нийлүүлж, Хөтөл хотын аж ахуй нэгж, айл өрхийг дулааны эрчим хүч, хэрэглээний халуун усаар ханган ажиллаж, мөн мэргэшсэн инженер техникийн ажиллагсадтайгаар үйлдвэрлэл үйл ажиллагаагаа тасралтгүй явуулж байгаа Монгол улсын стратегийн чухал ач холбогдол бүхий үйлдвэр байна гэдгийг онцлон тэмдэглэж, үйлдвэр хамт олныг маш сайн ажиллаж байгааг сайшаасан юм.

Уулзалтын төгсгөлд Ерөнхий сайд У.Хүрэлсүх нь тус үйлдвэрийг бүрэн хүчин чадлаар нь хэрхэн ашигтай ажиллуулах, цементийг экспортод гаргах асуудал болон бусад асуудлуудад төр засгаас дэмжлэг үзүүлэх болно гэдгээ хэлсэн юм.